في يوم في ليله و سنه بحالها عاملين نسمع كلمه نخبه ..قاعدت مع نفسي كده و قلت يعني ايه نخبه ؟؟ كل ما قلب التلفزيون يا خويا يقولي النخبه كل ما افتح جورنااال يقولي النخبه بتقول كده.بعد كل وكسه من الوكاسات اللي مرت بيها بلدي حبيبتي يجبلي مانشيت طولو اد عرضو و وشو زي قفاه يقولي النخبه رايها كذا .تيجي تحصل حاجه مثلا و اتكلم مع امي فيها تقولي اسكتي لو سمحتي النخبه رايها كدا وانتي ايش فهمك انتي يا امو واحد و عشرين سنه ..سكت و قررت اني اعرف معني النخبه يعني ايه نخبه .قلت ابدا اني اخذ راي الكبير بتاعي رحت لبابا قولتولو يا بابا ايه هيه النخبه ..قالي يا بنتي همه صفوه بلدك اللي يوم مبنحس اننا مزنوقين في راي و لا محشورين في موقف همه اللي بينقذونا علي طول حسيت بيني و بين نفسي انو بيتريق قلت ده اخر كلام عندك يا بابا قالي اه..قولت بيني و بين نفسي لا مش هاخد راي حد تاني انا هبحث و اتمحص و افحص الاول و بعد كده اقرر بنفسي ..فتحت شبكه المعلومات العنكوبوتيه وقلت يلا يعني ايه نخبه ؟؟؟ فتحت المعجم كده لقيت ان معنها همه جماعه من الناس المنقاه و المختاره من مجموعه كبيره من الناس قلت يالهوي انا منقتش حاجه حصل امتي ده سالت كل اللي اعرف نفر نفر محدش نقي حاجه قلت يمكن انا مش مواكبه الاحداث و لا الناس اللي اعرفهم..
و بعد ما عرفت يعني ايه نخبه و معناها الاصلي في اللغه العربيه حاولت اربط ملقتش اي حبل يربط ما بين الاتنين اللي بشوفو ليل و نهار علي التلفاز و اللي قريتو انشاله حتي حبل غسل..قلت معلش يا بت بدات اسال اصحابي المثقفين و اللي كاتبين قبل اسمهم علي التوتير ناشط سياسي ..و بعد ما سالت كذا حد مفهمتش حاجه بردو بصيت في المرايا قلت لنفسي اوعي يا بت تكوني غبيه و لا غبيه مهو مش كلمه اللي هطلع عينيك كده قلت لا للياس وبدات افكر في محور بحث تاني وهوه اني اتفرج عليهم نفر نفر في التلفاز من الساعه سابعه بليل و لحد 2 بليل مرورا بجميع التوك شو من اول الحياه اليوم لحد القاهره اليوم بقيت اعرف اسامي مقدمين التوك شوو اكتر من اسمي .حد هيقولي و ليه التوك شو هقولو لانهم اللي بيجبو النخبه يا ذكي .بعديها بشويه و بعد المتابعه الدقيقه العميقه اصابتني اعراض اكتئاب حاده غثيان مستمر .حول في العين .الي جانب تكسح في القدمين ....وقررت اخد اسبوع راحه في الاسبوع ده جاتلي اعراض انسحاب طفيفه زي تشنجات او ما اسمع كلمه الان او العاشره او مساءا او هنا او اي حاجه فيهاحرف من حروف كلمه تجديد بلاضافه الي كلمتي قبل و بعد ....................
وبعد اسبوع من العلاج المتكون من فقره مكثفه لنجوم اف ام اللي احيانا بردو مبتخلاش بس اهو بجرعه مخففه والصراحه بدات اخف ......بعد كده قعدت مع نفسي و قلت في ايه مكنتش كلمه و يعد التفكير الطويل قدرت اوصل لمعني الكلمه دي ::
النخبه ::: هيه عباره عن قاعده انس تضم جميع من تؤل لهم انفسهم انهم يتكلمو في اي حاجه و كل حاجه و في اي مكان مع العلم ان قاعده الانس دي بتتجمع حول طبليه ومن يشرف علي هذه الطبليه هوه المذيع او مطيب الخواطر ...
تيجو نتكلم بجد شويه ؟؟ اللي لازم نعترف بان بلدنا بلا نخبه و لو اتكلمنا باسلوب اشمل شويه هنتاكد ان احنا اساسا معندناش ناس اصحاب مشوره واحد لما يطلع في التلفزيون تحس من كلمو انو بيعشق تراب البلد دي ووبيخاف علي اهلها و عايز مصلحتها بل لما تشوفهم بيتكلمو بيتفننو في ان كل واحد ان كلامو يطلع صح و مش مهم اصلا اذا كان صح فعلا او لا ..انانفسي يعملو قانون و يسموهوه لو ملكش فيها و اتكلمت عليها هنعلقك عليها …………
بلد بلا نخبه محترمه مثقفه واعيه غير متحزيه زي اوضه من غير شباك زي عربيه من غير بنزيين
